राजकुमारले धेरै कुराको माग गर्छन् भन्ने आफूहरूको अनुमान रहे पनि उनी त्योभन्दा नितान्त फरक रहेको तासी बताउँछन्।

“त्यसै अनुसार तयारी पनि थियो। तर उहाँ त एकदमै सामान्य हुनुहुँदो रहेछ। बरु टोलीले सुविधा खोज्ने, उहाँ चाहिँ जस्तो शेर्पाले खान्छ त्यस्तै खान रूचाउने,” उनले भने।

राजकुमार सोचेभन्दा निकै सामान्य रूपमा प्रस्तुत हुँदा आफूहरू अचम्मित भएको तासीले सुनाए।

अरू बेला धेरै दुख नभए पनि मनास्लु आरोहण गरेको दिन भने लगातार २८ घण्टासम्म हिँड्दा भने पूरा टोलीलाई गाह्रो भएको उनले बताए।

नयाँ सुरुवात

सगरमाथासहित कैयौँ हिमाल आरोहण गरेका तासी बहराइनको राजपरिवार सहितको टोलीले नेपालको पर्यटन क्षेत्रका लागि नयाँ ढोका खोलेका बताउँछन्।

“व्यक्तिगत प्रयोगका लागि बनाइने अत्यन्त महँगा सामानहरू मध्यपूर्वमा बिक्री हुन्छ। उनीहरू आर्थिक रूपमा निकै समृद्ध छन्। त्यस क्षेत्रका मानिसहरू अहिलेसम्म नेपाल आउने वातावरण बन्न सकेको थिएन।”

“राजकुमार सहितको टोलीनै नेपाल आएको अवस्थामा यसले हाम्रो हिमाली क्षेत्रका लागि नयाँ बजार विस्तार गरेको जस्तो लाग्छ,” तासीले भने।

मध्यपूर्वका देशहरूबाट अहिले नै धेरैले नेपालबारे चासो देखाउन थालेको उनी बताउँछन्।

उनीहरू खर्च गर्न नहिच्किचाउने अनि मरुभूमिबाट आएकाले नेपालको प्रकृतिले नै लोभ्याउने हुँदा पर्यटन व्यवसायीहरू उत्साहित रहेको तासी बताउँछन्।

“यात्राकै क्रममा पनि खोलानाला, डाँडा-झरना देख्दा उहाँहरू निकै रमाउनु भयो। हिमाल देखेपछि यो त जीवनमा कहिल्यै पनि चिताएको थिइन भन्नु भयो,” उनले भने।