प्रदेश र केन्द्रीय तहको चुनावका लागि डेढ वर्ष जतिको समय छ।

ओलीले तल्लो तहका अधिवेशनहरू गर्दा आगामी चुनाव जित्ने खालका सङ्गठनहरू निर्माण गर्न अधिवेशन प्रतिनिधिहरूलाई निर्देशन दिएका थिए।

आफूलाई विस्थापित गरेर बनेको सरकारले अढाई महिना बित्दा मन्त्रिपरिषद् पूर्णता दिन नसकेको, तुइन काण्ड लगायतका घटनामा राष्ट्र हितमा अडान लिन नसकेको भन्दै उनले यसले विकासका कामहरू अघि बढाउन नसक्ने समेत टिप्पणी ओलीले गरेका थिए।

नेकपा एमालेबाट छुट्टिएर बनेको नेकपा एकीकृत समाजवादीमा गएका नेता कार्यकर्तालाई ओलीले ‘बिग्रिएका मान्छे’ का रूपमा चित्रण गरेका थिए।

तर ‘अलमलिएर’ दल छाडेकालाई फिर्ता ल्याउन पहल गर्ने पनि उनले बताए।

विधान अधिवेशनको केन्द्रमा ओली

विधान अधिवेशन अघि र त्यस दौरान प्रदर्शन भएको व्यक्ति केन्द्रित प्रचार शैलीका कारण ओलीको आलोचना समेत भएको थियो।

कतिपयले देशको सबैभन्दा ठूलो दलले आफ्नो नेतृत्वलाई देवत्वकरण गरेको आरोप समेत लगाएका थिए।

आफ्नो सम्बोधनमा बोल्दै ओलीले आफ्नो उद्देश्य पार्टीलाई एकताबद्ध बनाएर सुदृढ स्थानमा पुर्‍याउनु रहेको बताए।

उनले भने, “हामी एकताबद्ध भएनौँ र सबै नेता भएर बुरूक्क उफ्रियौँ भने जुन दिन रानो हुँदैन मौरीको गोलो समाप्त हुन्छ।”

आफ्नो दलको एकतालाई तोड्न अनेक प्रकारका हल्ला र भ्रमहरू चलाइएको भन्दै ओलीले आफूलाई मूल नेताका रूपमा विश्वास गरिराख्न नेता कार्यकर्तालाई अनुरोध गरेका थिए।