काठमाडौं : प्रधानन्यायाधीश चोलेन्द्र शमशेर जबराले आफू संवैधानिक व्यवस्थाअनुसार प्रधानन्यायाधीश नियुक्ति भएकाले राजीनामा नदिने बताएका छन्। मंगलबार सर्वोच्च अदालतका न्यायाधीशसँगको छलफलमा प्रधानन्यायाधीश जबराले कसैले सडकबाट राजीनामा दे भन्दैमा आफूले राजीनामा नदिने स्पष्ट पारेका हुन्। जबराले फैसला विवादित भएका कारण आफूले राजीनामा दिनुपर्ने भए यसअघि ‘विवादित फैसला’ गरेका सबै न्यायाधीशहरुले राजीनामा दिनुपर्ने धारणा राखे।
‘आफू संवैधानिक प्रक्रियाबाट आएकाले संवैधानिक व्यवस्थाअनुसार अगाडि बढ्छु। कसैले सडकबाट राजीनामा दे भन्दैमा राजीनामा दिन्न,’ उनले भने,’ प्रश्न उठेका र विवादित श्रीमान्हरुले राजीनामा दिए आफू पनि दिन तयार छु।’
छलफलका क्रममा प्रधानन्यायाधीश जबराले कसैको प्रभाव र दबाबमा परेर आफूले पदत्याग नगर्ने बताए। जबरासँगको छलफलमा १५ जना न्यायाधीशहरुले प्रधानन्यायाधीशसँग मार्गप्रशस्त गरिदिन आग्रह गरेका थिए।
जबरासँगको भेटघाटपछि न्यायाधीशहरु पुन: आन्तरिक छलफलमा जुटेका छन्। प्रधानन्यायाधीशले राजीनामा नदिने अडान लिएपछि न्यायाधीशहरु पुन: छलफलमा जुटेका हुन्।प्रधानन्यायाधीश विवादमा तानिएपछि इजलास नियमित बस्न सकेको छैन। असन्तुष्ट न्यायाधीशहरुले बहिष्कार गरिदिँदा सोमबार फूलकोर्ट र इजलास पनि बसेन।
यस्तै मंगलबार १५ न्यायाधीशका लागि ८ वटा इजलास तोकिएको भएपनि बस्ने/नबस्ने अझैं टुंगो लागेको छैन। मन्त्रिमण्डलमा भागबण्डा खोजेको भन्दै जबराको चौतर्फी आलोचना भएको छ। सर्वोच्च अदालतका न्यायाधीशसहित विभिन्न कानुनी संघसंगठनले उनको राजीनामा माग गरेका छन्।
