टोक्योः जापानमा आलुको चरम अभाव छाएको छ। कोभिड-१९ र क्यानडामा आएको बाढीका कारण जापानमा आलुको अभाव भएको हो। क्यानडा र अन्य मुलुकमा गएको बाढीका कारण र कोभिड-१९ महामारीसँगै लागेको प्रतिबन्धका कारण जापानमा आलु आयात हुन नसकेको बताइएको छ। सोही कारण संकट छाएको अधिकारीहरुले बताएका छन्।
आलु अभावका कारण जापानमा आलुबाट बन्ने परिकार उपभोगमा गिरावट आएको बताइएको छ। अमेरिकी फास्ट फुड कम्पनी म्याकडोनाल्ड रेष्टुरेन्टले फ्रेन्च फ्राइजलगायत आलुबाट बन्ने अन्य परिकारमा कटौती गरेको अन्तर्रारष्ट्रिय मिडियामा खबर छ।
‘आलु अभावका कारण हामीले फ्रेन्च फ्राइज र चिप्सलगायत अन्य आलुका परिकारहरुको आकार सानो बनाएर बेच्ने गरेका छौं। हरेक दिन बन्ने आलुका विभिन्न परिकारलाई हप्तामा दुई दिन पकाएरमात्र बेच्ने गरेका छौं,’ जापानस्थित एक म्याकडोनाल्डस रेष्टुरेन्ट सञ्चालनकले भनेका छन्। जपानमा हालः ३ हजारभन्दा बढी म्याकडोनाल्ड्स रेष्टुरेन्ट सञ्चालनमा छन्। यसअघि जापानमा सन् २०१४ डिसेम्बरमा समेत देशभरि आलु अभाव भएको बताइएको छ।
