जसक्रममा मस्कोले रुसीहरूलाई ‘सधैँको लागि’ आफ्नो भएको बताएको क्षेत्रबाट मस्कोका फौज पछि हट्नु परेको थियो।

सिरियामा संलग्नता

उनको औपचारिक परिचयमा खुलाइए अनुसार सुरोभिकिन ५५ वर्षका भए।

उनले सन् १९९० को दशकमा ताजकिस्तान र चेचन्या, र हालसालै सिरियामा काम गरेका छन्।

सिरियामा मस्को सन् २०१५ मा प्रवेश गर्दै त्यहाँका राष्ट्रपति बसर अल असदको सरकारलाई सघाएको थियो।

जुलाईमा रुसी विदेश मन्त्रालयले जनाए अनुसार सुरोभिकिनले युक्रेनमा “दक्षिण”तर्फ फौजको नेतृत्व गरेका छन्।

सुरोभिकिनले चेचन्या र सिरियामा मानवअधिकार उल्लंघनका आरोपहरू सामना गरेकाले मानव अधिकारवादीहरूले यस निर्णयप्रति चिन्ता व्यक्त गरेका छन्।

यस नियुक्तीलाई चेचेन नेता रमजान कदिरोभ र भाडाका सैनिक उपलब्ध गराउने वाग्नर समूहका संस्थापक यभ्गिनी प्रिगोजिनले स्वागत गरेका छन्।

ती दुवैले रुसी सेनालाई युक्रेनमा थप निर्णायक ढङ्गले काम गर्न आग्रह गर्दै आएका थिए।

त्यसका बावजुद रुसी सेनाले त्यहाँ नागरिकहरूविरूद्ध युद्ध अपराध गरेको आरोप खेपिरहेको छ।

सर्गेई सुरोभिकिन सबैभन्दा पहिले सन् १९९१ को अगस्टमा तत्कालीन सोभियत नेता मिखाइल गोर्भाचोभविरूद्ध गरिएको कू को प्रयत्नसँगै मिडियामा छाएका थिए।

तत्कालीन सेनाका क्याप्टेन सुरोभिकिन मस्कोको मध्य भागमा नागरिक प्रदर्शनहरूविरूद्धको एउटा सैन्य कारबाहीमा संलग्न थिए।

प्रदर्शनकारीहरूले कैयौँ बख्तरबन्द सैन्य गाडीहरू आउने बाटो अवरोध गर्दै त्यसतर्फ ढुङ्गा र बोतलहरू फ्याकेका थिए।

सुरोभिकिनले अघि बढिरहन आदेश दिए। त्यसले तीन जनालाई कुल्चँदा उनीहरूको मृत्यु भयो।